Qırımda Rusiye makemesi qırımtatar Halil Ametovnı "Noman Çelebicihan batalyonında" iştirak etkeninde qabaatlap, beş yılğa azatlıqtan marum etti. Bu aqta Facebook saifesinde Qırımtatar resurs merkezi haber etti.
"Erkekni daa 2022 senesi arman ayında Herson vilâyetinde yaqaladılar, bundan soñ Aqmescit SİZO-sına alıp kettiler. O, Vladimir Merkezinde qanunsız ceza çekip otura", — dep aytıla Merkezniñ haberinde.
Mında şunı da hatırlattılar ki, 2014 senesinden başlap, "Noman Çelebicihan batalyonında" iştirak etkeninde qabaatlanıp, eñ azından 55 insan yaqalandı: 19 - ilhaq etilgen Qırımda, 36 - 2022 senesi fevralniñ 24-nden soñ vaqtınca işğal etilgen Herson vilâyetinde.
"Qırımtatar Resurs Merkezi bütün qanunsız ükümlerniñ lâğu etilmesini ve siyasiy mabüslerniñ deral azat etilmesini talap ete. Biz halqara toplulıqnı Ukrainanıñ vaqtınca işğal etilgen topraqlarında repressiyalarnı toqtatmaq maqsadınen Rusiyege qarşı basqını quvetleştirmege ve insan aqlarınıñ bozuluvı içün mesüliyetli olğan şahıslarğa qarşı şahsiy sanktsiyalar kirsetmege çağıramız", — dep qoştılar merkezde.
QRM-niñ bildirgenine köre, Qırım ilhaqı vaqtında uquq qoruyıcılar 399 mabüsni qayd etti, olar siyasiy sebeplerden taqip etile, olardan 241 - qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
