"Mahkeme bugün meni qabaatlı tanıp, 2000 ruble para cezasını berdi ve argumentlerim ve delillerim memuriy mesüliyetten qaçmaq ıntıluvı olğanını tüşüne. Men mahkemede, Ekstremizmge qarşı küreş merkeziniñ hadimleri memuriy dava malümatlarına pek resmiy yanaşqanında ve onı qaba bozuvlarnen tertip etkeninde israr ettim. Menimce, deliller bazasına köre bile ciddiy bozuvlar bar", - dedi Zudiyeva.
Onıñ aytqanına köre, jurnalist ve uquq qoruyıcı faaliyetinen oğraşmağa devam etecek, çünki onıñ areketlerinde Rusiye qanunlarınıñ bozuluvı yoq.
Advokat Nazim Şeyhmambetovnıñ qayd etkenine köre, imayesi istinaf şikâyetini azırlay. Bundan ğayrı, onıñ aytqanına köre, işğalci mahkeme imayeniñ delillerini köz ögüne almadı.
Fevralniñ 22-nde Canköyde Rusiye quvetçileri jurnalist ve uquq qoruyıcı Lutfiye Zudiyevanıñ evinde tintüv keçirdi. Onı, "Radio Svoboda" malümatını "yabancı agent" olaraq qayd etmeden yayınlağanı içün, "matbuat serbestligini qullanuvda" qabaatladılar. Lutfiye Zudiyeva "Qırım birdemligi" aq qorçalayıcı birleşmesiniñ koordinatorı ola. Martnıñ soñunda Rusiye kontrolindeki Aqmescitteki Kiyev rayon mahkemesi Zudiyevni 2500 ruble para cezasına mahküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
