Qırımnıñ Rusiye nezareti asıtndaki Çernomorskiy rayon mahkemesi ukrayinalı qadınğa "Rusiyege qarşı sözler" içün para cezasını bergen. Bunı mahkemeniñ matbuat hızmeti haber etti.
Qadınğa, "Rusiye Federatsiyası arbiyleriniñ Ukrayina topraqlarında areketleriniñ qanunsız olması, komandirleriniñ qanunsız emirlerini yerine ketirmeleri ve diger arbiy cinayetler aqqında açıq bildirmeleri" sebebi ile 30 biñ ruble para cezası tayin etildi.
RF quvetçileri ile işbirlik etken Rusiye tarafdarı bloger Aleksandr Talipov öz "Krımskiy SMERŞ" telegram kanalında para cezasına mahküm etilgen qadın Çernomorsoye köyündeki №1 orta tasil mektebiniñ ocası Yekaterina Pavlenko olğanını bildirdi. Talipovnıñ sözlerine köre, Pavlenko ğarbiy Ukrayinadan. Qadın büyük cenkniñ başlamasından berli öz noqta-i nazarını bildirip, Rusiyeni Ukrayinağa qarşı tecavuz ve Donbasta cenkni başlatıluv ile qabaatlay.
Rusiyede ve işğali altındaki topraqlarda Ukrayinağa qoltutqan sakinler taqip etile. Rusiye tarafdarı bloger Aleksandr Talipov Telegram kanallarında Ukrayinağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
