Rusiye kontrolindeki Qırım Yuqarı mahkemesi, Ukrayina Mudafaa nazirliginiñ Baş istihbarat idaresinen işbirlik yapqanı içün Kefede yaşağan adamnı 18 yılğa azatlıqtan marum etti. Bunı Qırımnıñ Rusiye prokuraturası ve FSB idaresi bildire.
Rusiye telükesizlik hadimleriniñ aytqanına köre, erkek "mahsus arbiy ameliyatnıñ keçirilmesine qarşı çıqıp" 2024 senesi ilk qış ayından 2025 senesi aprel ayına qadar Rusiye Federatsiyasınıñ ava mudafaası vastalarınıñ Kefede yerleşken yerlerini fotoğa çekken. Onı FSB hadimleri tutıp aldı ve "devletke hainliginde" qabaatladı.
Erkekniñ adı ve soyadı aytılmay. Rusiye kütleviy haber vastaları Rusiye Federal havfsızlıq hızmetiniñ videosını derc ete, videoda dava mabüsi olaraq qayd etilgen, yüzü körünmegen bir erkek Rusiye quvetçileriniñ versiyasını tasdıqlay. Bu video basqı altında yapılğan ola bile. Bu vaziyette FSB tarafından berilgen malümatnı mustaqil menbalar yardımınen tasdıqlamaq qıyın.
Ukrayina Mudafaa nazirliginiñ matbuat hızmeti bu malümatnı izaatlamadı.
Aq qorçalayıcılar, Qırımda Rusiye quvetçileri tarafından açılğan devlet hainligi, Ukrayina ile işbirlik, casuslıq ve diversiya maddeleri boyunca davalarnıñ sayısı artacağını tahmin eteler.