Kreml kontrolindeki Qırım Yuqarı mahkemesi iyünniñ 6-nda Ukraina vatandaşı Konstantin Davıdenkonı 10,5 yıl sert rejimli koloniyada qalmasına üküm etti. Onı Rusiye quvetçileri Aqmescitte casuslıqta qabaatlap tutqan edi.
Davıdenko Rusiye Ceza kodeksiniñ 276-ncı maddesine istinaden (çetel devletke bermek maqsadınen devlet sırı olğan malümatnı toplav) qabaatlandı.
Qırım aq qorçalayıcı gruppasınıñ saytında haber etilgenine köre, Konstantin Davıdenkonıñ ükmüni qadı Andrey Paliy çıqardı. Daa evel bu qadı diversiyalarda qabaatlanğan Ukraina vatandaşı Yevğen Panovnı üküm etken edi.
Konstantin Davıdenkonıñ davası boyunca mahkeme diñlevleri qapalı olğan edi. Rusiye prokurorı iyünniñ 5-nde keçirilgen mahkeme oturışuvında Ukraina vatandaşını 12 yılğa üküm etmege rica etti.
Fevral ayında Moskva şeer mahkemesi Davıdenkonıñ apis cezasını 2019 senesi aprelniñ 11-ne qadar uzatqan edi.
2019 senesi fevralniñ 12-nde Rusiye FSBsi Aqmescitte casuslıqtan şübheli sayılıp tutulğan Ukraina vatandaşı aqqında bildirgen edi. Ukraina Tış işler nazirligi Rusiye Tış işler nazirliginden tutuluv sebeplerini ve yerini bildirmesini talap etti.
Ukraina telükesizlik hızmeti Qırımda Rusiye FSBsi tarafından casuslıqtan şübheli sayılğan ukrainalınıñ tutulmasını izaatlamay.
Rusiyeniñ Qırım ilhaqından soñ FSB yarımadada jurnalist, faal, cemaat erbaplarını sorğuğa çeke, evlerinde tintüvler keçire. Aq qorçalayıcılar bunı başqa fikirde olğanlarnen küreş dep adlandıra.
