Rusiye kontrolindeki Aqmescitniñ Demir yol rayon mahkemesi yerli sakin Nikolay Onuknı "Rusiye devlet timsallerini aqaretlegeninde, vandallıqta ve patlayıcı cihaz saqlağanında" qabaatlap, üküm çıqardı. Bu aqta mayısnıñ 17-nde "Qırım esnası" uquq qorçalayıcı teşkilâtı haber etti.
Beyanatqa köre, bütün mahkeme esnası qapalı şekilde keçti. "Qırım esnası" yazğanına köre, mahkemeci Yevgeniya Romanenkova Nikolay Onuknı qabaatlı tanıp, umumiy rejimli koloniyada 5 yıl azatlıqtan marum etüv cezasını tayin etti, em de 50 biñ ruble para cezasını berdi.
Nikolay Onuk 2023 senesi avgust ayında tutuldı. O vaqıt Rusiye quvetçileri evine tintüvnen keldi. O, politsiya hadimine qarşılıq köstergeninde qabaatlandı. Davanı Aqmescitniñ Rusiye kontrolindeki Demir yol rayon mahkemesiniñ qadısı Natalya Pliyeva baqqan edi. Tintüv vaqtında onda Rusiye Federatsiyası tarafından işğal etilgen şeerlerde "Sarı şerit" areketiniñ tarqatqanına oşağan çeşit ukrayin atributları olğan fayllar tapıldı.
Daa soñra Nikolay Onuk Rusiye Memuriy cinayetler kodeksiniñ 20.3.3 maddesine istinaden (Rusiye Silâlı quvetleriniñ itibardan tüşürüvi) mesüliyetke çekildi, bu sene yanvar ayında ise Rusiye arbiy yayınları Nikolay Onuknıñ tutulğanınıñ operativ fotoresimlerini derc etip, onıñ cinaiy davalarnıñ figurantı olğanını bildirmege başladı.
"Beş aydan soñ ekstremistlerge qarşı küreşçiler onı mahsus operatsiyalar hızmetiniñ agenti olaraq ilân etip, bunı cinaiy dava açılğanı kibi köstermek mecbur ettiler. Asılında ise, bu, ideologik sebeplerden vatandaş ealisini taqip etüvdir. Cinaiy işniñ meydanğa ketirilmesini lâğu etüv - qorquzuv ve sadıq olmağan gruppalarnıñ vekillerini celp etüv usulıdır", — dep bildire "Tribunal. Qırım epizodı" Telegram-kanalı.
Qırımnıñ Rusiye quvet organları öz resurslarında Nikolay Onuknıñ yaqalanğanı aqqında haber etmey. Onıñ taqipnen bağlı mevamı belli degil.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
