Rusiyeniñ nezareti altında olğan Qırımnıñ Yuqarı Mahkemesi istinaf şikâyetini baqtı ve vatandaş jurnalisti Rolan Osmanovğa "biraz yaramazlıq" davası üzre berilgen cöremeni quvette qaldırdı, dep haber ete "Qırım birdemligi".
Bundan evel başlanğıç mahkeme oña 70 biñ rubleye para cezasını bergen edi.
"Rolan Osmanov qabaatını tanımadı ve oña qarşı kösterilgen areketlerni yapmaq niyetinde olmağanını añlattı", - dep bildirdi uquqçı Nazim Şeyhmambetov.
Protokol 2023 senesi mart ayınıñ ortasında tizildi. Osmanovnıñ evinde tintüv keçirildi, bundan soñ faalni Rusiye FSB idaresine sorğuğa alıp ketkenler. Bina çıqışında Osmanovnı «E Merkeziniñ» (Rusiye Federatsiyasınıñ İç işler nazirliginiñ ekstremizm ile küreşniñ baş idaresi) hadimleri tuttı ve Rusiye İç işler nazirliginiñ binasına alıp kettiler.
Rolannı internette biraz yaramazlıq yapqanında qabaatlaylar. O bıltır küzde keçirilgen qısmiy seferberliknen bağlı fikrini aytqan eken. O, bir çoq insan, hususan qırımtatarlar Qırımdan kete dep fikirlerini paylaşqan edi.
Rolan Osmanov – qırımtatar faali, vatandaş jurnalisti ve strimer. O, «restavratsiya» manaçığınen Han sarayınıñ yoq etilüvine qarşı narazılıq bildirgen edi.
2022 senesi iyülniñ 13-nde «Nariman Celâl davasınıñ» esnası keçirilgen Rusiye Qırım Yuqarı mahkemesiniñ binası ögünde 39 yaşında Rolan Osmanovğa vatandaş urbasında, maskalı insanlar kelip tuttı. Daa soñra alınğan malümatqa köre, onı advokatlarnı tutuv ile alâqası olğan «E» merkeziniñ yolbaşçısı Ruslan Şambazov tuttı. Onıñ qararında Osmanov Facebook saifesinde «Rusiye Federatsiyasınıñ silâlı quvetlerini itibardan tüşürgen» paylaşuvlar yaptı, dep aytıla. «E» bölügine barmaq talabını red etti, er şeyni cep telefonına çıqardı, «itti» ve «tirendi». Onıñ areketleri Rusiye Federatsiyası Memuriy uquq bozuvları kodeksiniñ 19.3 maddesiniñ 1-nci qısmına istinaden memuriy protokol temeli oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
