Rusiye kontrolindeki Aqmescitniñ Kiyev rayon mahkemesi qırımtatar faali Edem Bekirovnıñ tevqif müddetini aprelniñ 12-ne qadar uzattı, dep bildire «Qırım birdemligi» cemaat birleşmesi.
Rusiye tahqiqatınıñ vekili mahkemede tevqif müddetiniñ uzatılmasını istedi, çünki Bekirovnıñ Ukraina vatandaşlığı bar ve «o, qomşu devletke qaça bile» eken.
Bekirovnıñ advokatı İslâm Velilâyev müvekkiline daa da yımşaq sıñırlav tedbiri berile bile, dep israr etti. Çünki daa evel mahküm etilmegen edi ve qabaatlanğan cinayetniñ delilleri tek gizli şaatnıñ malümatına esaslana. O, Bekirovnıñ ağır sağlıq vaziyeti aqqında hatırlattı. Buña baqmadan, mahkeme Bekirovnı Aqmescit SİZOsında qaldırdı.
Cumaaqşamı künü mahkeme oturışuvında Edem Bekirov Aqmescit SİZOsında tutuluvı insan itibarını aşalay, Rusiye tahqiqatı onı boysundıracaq ola, dedi. Bekirov qabaatsız olğanını ve birinci derece saqatı, silâ taşımağa küçü yetmegenini hatırlattı.
Fevralniñ 6-nda Kyivdeki matbuat konferentsiyasında Edem Bekirovnıñ qızı Eleonora babasınıñ hastalıqları ölümine sebep ola, dep qorqqanını aydınlattı. Onıñ aytqanına köre, Aqmescit SİZOsında Bekirovğa kerekli tibbiy yardım kösterilmey.
Daa evel Ukraina Yuqarı Radasınıñ insan aqları vekâletlisi Lüdmila Denisova Qırımda apiske alınğan qırımtatar faali Edem Bekirovnıñ sağlıq vaziyeti kritik, dep bildirgen edi.
Daa evel Bekirov ilk tahqiqat çerçivesinde belgilengen psihologik-psihiatrik ekspertizadan keçti, dep haber etilgen edi.
Qırımda tevqif etilgen qırımtatar faali Edem Bekirov «Qırım birdemligi» areketiniñ koordinatorlarından biri Server Mustafayev ile SİZOda aynı kamerada qala.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.
