Rusiye kontrolindeki Qırım Yuqarı mahkemesi, Rusiye tarafından teşkil etilgen Qırımnıñ Kirov rayon mahkemesi tarafından "hırsızlav" davası boyunca 50 biñ rusiye rublesi miqdarında para cezasını alğan qırımlı Emine Zekeryaevağa qarşı çıqarılğan ükümni deñiştirmedi.
Bu aqta "Qırım birdemligi" cemaat birleşmesine onıñ advokatı Emil Kurbedinov bildirdi.
Kurbedinovnıñ aytqanına köre, mahkemeler "bu qabaatlavnı obyektiv baqmaq istemey". İmaye tarafı mahkemede "birinci instantsiya mahkemesinde pek çoq qaba bozuv" olğanını qayd etti. Amma mahkeme olarnı körmemezlikke urdı.
Zekeryayeva qabaatını tanımadı ve ne birinci instantsiya mahkemesiniñ, ne de istinaf mahkemesiniñ qararınen razı olmağanını bildirdi.
"Bu, Qırımda bu kibi dava boyunca qorçalavımızğa tüşken ilk qabaatlav degil. Esasen, er şey FSB hadimleri er bir insannı gizli agentleri yapıp, er bir şübeli insannı bildirmek istegenlerine ketire. Olar öz işini adiy insanlarğa keçirmege isteyler, amma bu madde öyle çalışmay... Demek ki, er birimiz etrafta dolaşıp, şübeli şahıslarnı qıdırmaq kerekmiz. Olar aqqında haber etmeseñiz, ya da birisi sizge telefon açsa ya da mesaj yazsa, FSB-ge haber etmek kerek", — dep qayd etti Kurbedinov.
Onıñ aytqanına köre, imayesi istinaf mahkemesiniñ qararını kassatsiyağa şikâyet etecek, bundan soñ halqara qurulışlarğa muracaat etip, böyle qabaatlav boyunca qarar almağa tırışacaq, dep qayd etti advokat.
İyünniñ soñunda Rusiye qurğan Qırımnıñ İslâm Terek rayon mahkemesi Eski Qırım şeerinden qırımlı Emine Zekeryayevanı "çaqmama" davasında qabaatlı dep tanıdı ve 50 biñ Rusiye rublesi para cezasını berdi.
Rusiye tahqiqatınıñ versiyasına köre, 2016 senesi Zekeryayeva "VKontakte» içtimaiy ağında Ukrayina vatandaşı Madina Strâpçaynen yazıştı, soñra o, Suriyege ketti, anda «Rusiye Federatsiyasınıñ menfaatlarına zıt kelgen" maqsatları olğan silâlı taqımğa qoşulğan ve terror eylemini yapmaqnı planlaştırğan. Qırımtatarı 2023 senesi avgust ayında evinde keçirilgen tintüv vaqtında taqiqatçılarğa Strâpçay aqqında malümat bermedi ve bu malümatnı gizledi, dep qabaatlandı.
2023 senesi vavgustnıñ 7-nde Eski Qırımda 30 yaşındaki qırımtatarı Asan Zekeryayevniñ evinde keçirilgen edi. Bundan soñ erkekni bellisiz yerge alıp ketken ediler. Soñra olarnıñ evinde daa bir tintüv keçirildi. Evlerini silâlı insanlar ve zırhlı arabalar sarıp alğan edi.
Tintüvden soñ tutulğan Asan Zekeryayev ve apayı Emine Zekeryayevanı Aqmescitke alıp ketken ediler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
