Rusiyeniñ nezareti altında olğan Qırımnıñ Yuqarı mahkemesi advokat Nazim Şeyhmambetovnıñ tevqif etilmesi ve advokat Edem Semedlâyevniñ cörelenmesine dair bundan evelki instantsiyanıñ qararına qarşı berilgen istinaf şikâyetlerini red etti. Bunı "Qırım birdemligi" cemaat birleşmesi haber etti.
"Bu dava tamamınen siyasiydir. Onıñ maqsadı dünyada siyasiy mabüsler kibi tanılğan vatandaşlarğa uquqiy yardım köstergen advokat ve adliyecilerge basqı yapmaqtır", - dedi Şeyhmambetov.
Semedlâyevniñ fikrince, "dava advokatlarnıñ davalarnı ve vaqialarnı aydınlatmaması maqsadınen açılğan".
Qırımda mayısnıñ 26-ndan başlap dört qırımlı advokat tutuldı. Başta advokat Edem Semedlâyev tutuldı, onı Facebook qullanıcısı tarafından Rusiye Federatsiyası ordusınıñ Ukrainada yapqanlarına dair paylaşuvda qayd etilgeni içün Rusiye ordusını «itibardan tüşürgeninde» qabaatladılar.
Mayısnıñ 27-nde Rusiye kontrolindeki Aqmescitniñ Merkeziy rayon mahkemesi qırımlı advokat Nazim Şeyhmambetovnı sekiz künge idariy apiske aldı. Şeyhmambetovnı qorumaq içün mahkemege kelgen advokatlar Ayder Azamatov ve Emine Avamileva da Rusiye uquq qoruyıcıları tarafından tutuldı.
Mayısnıñ 29-nda Rusiye kontrolindeki mahkeme advokat Emine Avamilevanı beş künge apiske aldı. 8 künge apiske alınğan Ayder Azamatov kibi o da 2021 senesi oktâbrniñ 25-nde zenaatdaşları Edem Semedlâyevni polis bölüginiñ binası ögünde qoruğanda cemaat nizamını bozğan (İdariy uquq bozuvları kodeksiniñ 20.2.2 maddesiniñ 1-inci qısmı) vatandaşlarnıñ cemaat yerlerinde aynı vaqıtta kütleviy bulunğanını teşkil etkeninde qabaatlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
