Rusiye kontrolindeki Qırım Yuqarı mahkemesi Kefe sakinini Ukrayina telükesizlik hızmetinen işbirlik yapqanında qabaatlanıp, 19 yılğa azatlıqtan marum etti. Bu aqta İlk yaznıñ 25-nde Qırımnıñ Rusiye prokuraturasınıñ matbuat hızmeti bildirdi.
Qayd etilgenine köre, erkek, "mahsus arbiy operatsiyanıñ" keçirilmesine qarşı çıqqanlardan olıp, 2022-2023 seneleri devamında Rusiye Federatsiyasınıñ arbiy ve deñiz gemileriniñ fotoresimini çekip, bu malümatnı Ukrayin tarafına bergen. Rusiye quvetçileriniñ iddialarını alternativ menbalar vastasınen teşkermek cenk şaraitinde qıyın.
Adamnıñ adı ve soyadı bildirilmey, onıñ içtimaiy mevamı da belli degil. Bundan ğayrı, Rusiye mahkemesi oña 400 biñ ruble para cezasını belgilegen ve maşnasını tutıp alğan.
SBU bu haberni açıq izaatlamadı.
Rusiyede ve onıñ tarafından işğal etilgen topraqlarda quvetçiler Ukrayina tarafını tutqan sakinlerni taqip eteler. Rusiye tarafdarı olğan Qırımlı bloger Aleksandr Talipov öz telegram kanalında Ukrayinağa qoltutqan Qırımlılarnıñ şahsiy malümatlarını derc ete. Böyle şikâyetlerniñ neticesinde Qırımlılar tutula ve Rusiye ordusını "itibardan tüşürgeni" içün memuriy ve cinaiy mesüliyetke çekile.