Rusiye kontrolindeki Qırım Yuqarı mahkemesi 2014 senesi qırımlı faal Timur Şaymardanovnıñ hırsızlanuvınıñ tahqiqatını yañıdan başlamamağa qarar aldı. Bu aqta advokat Emil Kurbedinov "KEMsk vilâyeti" telegram kanalında bildirdi.
''Qırım Yuqarı mahkemesi (Aqmescitniñ Kiyev rayon mahkemesiniñ qararını deñiştirmeyip) 2017 senesinden başlap 2014 senesi Timur Şaymardanovnıñ hırsızlanuvınıñ taqiqatını toqtatmaq kerekligi aqqında qarar çıqardı'', - dep bildirdi advokat.
Şaymardanov "Ukrayina halq evi" cemaat teşebbüsiniñ faali, 2014 senesi mart ayında Qırımda ukrain arbiylerine gumanitar yardımda iştirak etti..
Qırım işğalinden evel Timur iş adamı edi, çeşit mallarnı sata edi, bundan evel sigorta ve auditorlıq firmalarında çalıştı, qazan tatarları diasporasında faal faaliyet köstergen edi. Yevromaydan başlağanınen anda onıñ tarafdarları sırasına kirdi. 2014 senesi mart ayında Timur Ukrayina yalı mudafaası ştabınıñ divarları yanında gece-kündüz nevbetçilik teşkil etüvde iştirak etti, faaller elinden kelgen yardımnı kösterdi, ukrayin arbiyleriniñ cenk ruhunı yırlarınen destekledi.
2014 senesi baarinde Timur Şaymardanov bir qaç kere Kıyivge barıp, arbiy ve siyasetçiler ile körüşken edi. Amma, soy-sop ve dostlarına aytqanı kibi, resmiy Kıyivde Qırımnı faal şekilde qorçalamaq istegini körmedi. Bu sebepten qırımlı göñülliler diger vazifelerge diqqat ayırdılar.
Böyleliknen, Timur Perevalnoye köyünde 36-ncı yalı mudafaası brigadasınıñ ukrayin askerleri içün gecelemek içün yer, aş ve para qıdırğan. Komandir rusiyeli arbiylerni kirsetti, 36-ncı brigadanıñ dağ-ayak batalyonınıñ 80-ge yaqın ukrayin askeri soqaqta qaldı.
Soñra Şaymardanov ukrayin askerlerini Qırım territoriyasından çıqarmaqnen oğraştı. "Ukrayina halq eviniñ" göñüllileri eki biñden ziyade arbiyge yardım etti.
2014 senesi mayıs 26-da Aqmescitteki evinden çıqıp, qaytmadı.
2018 senesi iyün ayında Kremlniñ kontroli altında olğan Qırım Yuqarı mahkemesi advokat Emil Kurbedinovnıñ Şaymardanovnıñ hırsızlanuvı ve ğayıp oluvı davasınıñ taqiqat areketlerine qarşı şikâyet arizasını red etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
