Suriyege oktâbrniñ 15-nde Qırımdaki Rusiye akimiyetiniñ vekilleri keldi, dep bildire Kreml nezaretindeki yarımada ükümetiniñ matbuat hızmeti.
«Ziyaret programmasında Suriyeniñ reberligi ile körüşüvler olması planlaştırıla, gemi şirketi ve ticaret evi leyhaları muzakere etilecek», – dep aytıla haberde.
Ükümetniñ malümatına köre, Suriyege Sergey Aksenov, Vladimir Konstantinov, Georgiy Muradov, Olga Kovitidi, Oleg Belaventsev, Rusiye sanayı siyasmeti, kurort ve turizm, medeniyet nazirleri, parlament deputatları, Qırım cemaatı ve biznesiniñ temsilcileri keldi.
Qırımnıñ Rusiye memurları Suriyeniñ iqtisadiyat ve tış ticaret naziri Samer Al-Halil ile körüşmege niyetlengenini bildire.
Bundan ğayrı, olar Qırım ve Latakiya arasında ticaret-iqtisadiyat, ilmiy-tehnik ve gumanitar işbirligi añlaşmasını imzalamağa planlaştıralar.
Daa evel haber etilgeni kibi, Qırımnıñ Rusiye akimiyeti oktâbrniñ 15-16-nda Suriyeni ziyaret etmege planlaştıra.
Rusiye nezaretindeki «Krımskiye morskiye portı» müessisesi bildirdi ki, bu yılnıñ soñunda Suriye içün kömür, zahire ve qurucılıq malzemeleri endirilecek.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
