Qırımdaki Rusiye akimiyeti koronavirus hastalağınıñ tarqaluvına qarşı semereli telükesizlik tedbirlerini keçirmey. Böyle fikrini Qırımtatar Milliy Meclisiniñ reisi Refat Çubarov bildirdi.
«Bundan ğayrı, Qırımda insanlarnıñ koronavirus hastalığı telükesine sayğısız ve mısqıllı yanaşuvı resmiy seviyede rağbetlendirile edi», – dep yazdı Çubarov Facebookta.
Onıñ qayd etkenine köre, «Rusiye tarafından işğal etilgen Qırım vaziyetinde semetdeşlerimizge ve yarımadada yaşağan bütün Ukraina vatandaşlarına yardımnıñ esas şekli mahsus halqara teşkilâtlar, hususan Dünya sağlıq nazirligini Qırımda koronavirus hastaları aqqında haberdar etüv ve koronavirus yuqunçınıñ qırğınlığı vaziyetinde Qırımnıñ işğalci akimiyetiniñ areket talili ola».
«Rusiyeni halqara gumanitar uquqqa köre işğalci devlet olaraq mesüliyetli olmağa mecbur etmek içün elimizden kelgenini yapacaqmız», – dep qoştı Çubarov.
Qırımda ilk koronavirus hastası tasdıqlandı.
Yarımadanıñ Rusiye akimiyeti bildirgenine köre, Qırımda hastanen alâqada olğan er kes ve atta onı alıp ketken taksi aydavcısı tapıldı ve tecrit etildi.
İşğal etilgen Aqyarda martnıñ 22-nde saba koronavirus hastaları tasdıqlanmadı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
