Bugünge qadar ilhaq etilgen Qırımda Rusiye quvetçileri Rusiye ordusınıñ "diskreditatsiyası" aqqında 780 protokol tizdiler. Bu aqta Qırım.Aqiqat Radiosınıñ efirinde Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denis Çistikov bildirdi.
Olardan 680-i içün mahkeme qararları çıqarıldı. "Umumiy statistikadan körgenimiz kibi, Qırım Rusiye uquq qoruyıcı organları içün eñ müim yerlerden biridir, çünki o, Rusiye ordusınıñ itibarını tüşürgen davalarnıñ sayısına köre liderler sırasına kire. Bundan da ğayrı, qayd etmek kerek ki, bu maddeler boyunca ceza sanktsiyalarından olar 21 million rusiye rublesinden ziyade topladılar", - dep tarif etti Denis Çistikov.
Temsilcilikniñ malümatına köre, Rusiyege boysunğan Qırım mahkemeleriniñ qararlarınıñ 41% qadınlarğa nisbeten çıqarılğan. Rusiye Silâlı quvetleriniñ itibarını tüşürüv maddesi bu memleketniñ Ceza kodeksinde Rusiyeniñ Ukrayinağa tam miqyaslı istilâsından soñ peyda oldı. Rusiye akimiyeti cenk ile razı olmağanlarnıñ qarşılıq kösterüvinen bu şekilde küreşmege tırışa, dep ayta Çistikov.
"Qırımda olğanlardan tam miqyaslı istilâdan soñ olğan qarşılıq ve mahkeme qararlarından körgenimiz faallik Qırım Ukrayina olğanını köstere ve Qırımda yaşağan Ukrayina vatandaşları anda olğanlarnı qabul etmek istemeyler", – dep qayd etti Denis Çistikov.
Daa evel Ukrayina prezidentiniñ Qırım Muhtar Cumhuriyetindeki temsilciligi, aprelniñ 11-nde ilhaq etilgen Qırımda Rusiye mahkemelerine Rusiye Silâlı quvetleriniñ "diskreditatsiyası" aqqında 737 material kelgenini bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
