Rusiye kontrolindeki Qırım ükümetiniñ Fevqulâde vaziyetler nazirliginiñ küç ve vastaları ava bozulğanı içün fevqulâde vaziyetler olacağına azırlıq köre, dep bildire müessise yolbaşçısı Sergey Şahov.
«Bozulğan ava sebebinden (küçlü yağanaqlar, quvetleşken yel, ava araretiniñ tüşmesi, qar) qırımlı qurtarıcılar yarımada sakinleri ve musafirlerine yarımada yollarında areket telükesizliginiñ qaidelerine riayet etmege ve deñişken avanı taqip etmege tevsiye ete», – dedi o.
Onıñ aytqanına köre, yarımada yollarında qaza sayısınıñ artuv ihtimali bar.
Qurtarıcılar ava bozulğanda turist ve alpinistlerni Qırım dağlarınıñ uzaq ve barması zor olğan yerlerde bulunmasından vazgeçmesine, qaytuv vaqtını doğru belgilemesine, yanında qalın urba taşımasına ve tuvğanlarına ve yaqınlarına bulunğan yerini bildirmesine çağıra.
Gemi saiplerine de avanı taqip etip, bozulğanda deñizge çıqmamağa tevsiye etile.
Yarımadada dekabrniñ 2-nde tumanlı ava sebebinden ava limanı ve vertolöt meydançıqlarınıñ işi zorlaşacaq, dep tahmin etile. Qırımda dekabrniñ 3-ne telükeli gidrometeorologik adiselerine dair furtuna ihtarı ilân etildi.
