Qırımdaki Rusiye İç işler nazirligi dümen başında sarhoş aydavcılarnı tapmaq içün tedbirler quvetleştirildi, dep bildire. Müessiseniñ matbuat hızmeti bildirgenine köre, yollardaki reydler insanlar toplanğan yerlerde keçirilecek: alış-veriş merkezleri ögünde, raatlıq ve eglence yerlerinde, naqliyat tıqanıqlıqları ve qazalar ola bilecek yerlerde.
«Yañı yıl bayramlarında yollarğa, hususan büyük şeerlerde, yol-patrul hızmetiniñ qoşma taqımları çıqtı. Bayram künleri mında qomşu vilâyetlerden ve mesken yerlerinden kelgen maşinalar çoq olğanı içün naqliyat tıqanıqlıqları ola», – dep aytıla haberde.
Berilgen malümatqa köre, sarhoş aydavcılarğa loyal munasebet «yoq ve olmaycaq».
«Er yerde bozuvlarnıñ ögüni almaq ve dümen başında sarhoş olğan aydavcılarnı tapmaq içün kütleviy teşkerüvler ve mahsus tedbirlerniñ keçirilüvi planlaştırıla».
Qırımdaki Rusiye İç işler nazirligi, dümen başınja sahroş olğanlarnı 30 000 ruble (11 400 ğrıvnâ – QA) para cezası ve 1,5 yıldan 2 yılğa qadar dümen başına oturmaq yasağı bekley.
Rusiye politsiya hadimleri Aqmescit-Kezlev yolunda yolcu avtobusınıñ sarhoş aydavcısını tutqan edi.
Qırımlı qurtarıcılar, Qırımda ciddiy yol qazalarınıñ sayısı arttı, dep qayd etti.
