Qırımda Rusiye polisiniñ hadimleri aprelniñ 20-nde İçki qasabasında Qırımtatar Milliy Qurultayınıñ delegatı Rustem Mennanovğa «qanun bozulmaycağına dair» tenbi berdi.
Bu aqta «Qırım birdemligi» Qırım.Aqiqatqa bildirdi.
Mennanovnıñ aytqanına köre, polis onı «ekstremist faaliyetinen oğraşmamalı», dep tenbiledi. İhtar vesiqasında angi aktsiyalar aqqında aytıla ya da keçirilecek künleri qayd etilmey.
Mennanovnıñ aytqanına köre, vesiqanı oña Rusiye polis kapitanı Aleksey Rıçkov berdi, faqat faal olarnı imzalamağa razı olmadı.
Faal, berilgen ihtar vesiqasını «faal vatandaş fikirleri» ve Qırımtatar Milliy Meclisi ile alâqaları bar olğanından basqı dep saya.
Yanvarniñ 30-nda Qırımda üç qırımtatarı Rustem Mennanov, Asan Seythalilov ve Eldar Seyt-Eminovğa «qanun bozulmaycağına dair» tenbiler berilgen edi.
2017 senesi Kreml kontrolindeki İçki mirovoy mahkemesi Rustem Mennanovğa içtimaiy ağda Qırımtatar Milliy Meclisini añğanı ve qırımtatar halqınıñ lideri Mustafa Cemilevniñ doğğan kününi tebriklegeni içün 2 biñ ruble (920 ğrıvnâ – QA) para cezasını berdi. Faal Rusiye Memuriy bozuv kodeksiniñ 13.15 maddesine istinaden qabaatlandı – «kütleviy haber serbestligini suistimal etüv».
2016 senesi aprelniñ 26-nda Rusiye kontrolindeki Qırım Yuqarı mahkemesi işğal altındaki yarımadada Qırımtatar Milliy Meclisiniñ faaliyetini yasaqladı. Meclisniñ imayesi Rusiye Yuqarı mahkemesine istinaf şikâyetini yolladı. Lâkin 2016 senesi sentâbrniñ 29-nda Rusiye Yuqarı mahkemesi bu istinafnı red etip, Meclis faaliyetiniñ yasağını tasdıqladı.
2017 senesi aprelniñ 19-nda BM Halqara mahkemesi Ukrainanıñ Rusiyege qarşı davasında ara qarar çıqardı. Gaagadaki mahkeme Kyivniñ Terrorizmni maliye etüv yasağı şartnamesi çerçivesinde Rusiyege qarşı muvaqqat tedbirler talaplarına qol tutmadı. Amma Moskvadan qırımtatarlarnıñ ve etnik ukrainlerniñ aq bozuluvını toqtatması, Meclisni ğayrıdan tiklemesi ve işğal etilgen Qırımda ukrain tilinde tasil temin etmesini talap etildi.
Qırımnıñ farqlı rayonlarında apiske alınğan ve mahküm etilgen qırımlılarnıñ soy-sopları, faaller, vatandaş jurnalistleri ve din adamları çeşit sebeplerden kelgen polis ziyaretleri aqqında bildirgen ediler. «Qırım birdemligi», olarnıñ aq qorçalayıcı ofisine 20-den çoq insan muracaat etti, dep bildirdi.
