Yanvarnıñ 22-nde Qırımdaki Rusiye polisi Canköy rayonında Timofeyevka köyünde yaşağan qırımtatar Riza Asanovğa tenbi vesiqasını berdi, dep haber ete “Qırım birdeligi”.
Erkekniñ aytıp bergenine köre, oña yerli polis hadimi kelgen, miting ve narazılıq aktsiyalarında iştirak etmege yasaq olğanı aqqında bildirgen.
“Nasıldır bir miting, narazılıq aktsiyalarına ketmemege tenbiyeledi. Bundan ğayrı qorantamda qaç adam olğanı aqqında soradı, olarnıñ aqqında malümatnı yazıp aldı. Bunı yerli polisi olğanınen añlattı, bu malümatnı bilmek kerek eken”, – aytıp berdi Riza Asanov.
Evel, Rusiye quvetçileri qırımtatar faalleri Aziz Karahalilov ve Arsen Yakubov, “Qırım birdemligi” cemaat birleşmesiniñ koordinatorı Mustafa Seydaliyev ve mühbiri Emin Rustemovnı ziyaret etip, olarğa “Qırım Cumhuriyetinde yüksek azırlıq vaziyeti” rejiminiñ tayin etilmesi sebebinden mitingler keçirilmesiniñ ve ziyaret etilmesiniñ yasaq etilmesi aqqında tenbi vesiqasını berdiler.
Qırım boyunca Rusiye İİN idaresi ziyaretlerniñ sebepleri aqqında iç bir şey bildirmedi.
