Tünevin aqşam ve bugün gece Rusiye tarafından işğal etilgen Qırımda patlavlar oldı, Rusiye ava mudafaası vastaları ve mobil ateş gruppaları çalıştı, Aqyarda ise işğal akimiyeti ava telükesini ilân etti. Bunı yerli telegram lanalları haber ete.
"Krımskiy Veter"niñ malümatına köre, aqşam saat 22:37-de "Qaçı" uçaq alanı civarında zenit atuvları eşitilgen ve "Fedühin yükseklikleri" civarında patlavlar eşitilgen. Bağçasaray rayonında adamlar "Aqyar tarafına uçqan yahşı dronlar" aqqında haber ettiler, İçki rayonı üzerinde ise "Rusiye Ava mudafaası quvetleri dronlarnı mesken binalar üzerinde urıp tüşürmege areket eteler".
Qırım menbalarınıñ malümatına köre, Kefe ve onıñ civarı üzerñinden dronlarnıñ uçıp keçmesi qayd etilgen. Aqmescitte eki patlav eşitildi, Sarabuz qasabası civarında olsa kerek, anda Rusiyeniñ arbiy uçaq alanı yerleşken. Aqyarda, Fiolent burnu yanında, Rusiye arbiy bölükleri yerleşken yerde mobil yanğın söndüriciler çalışqan.
Ücüm neticesinde "Keriç elektriksiz qaldı", Kefede "şeeriniñ büyük qısmı" da elektriksiz qaldı.
Rusiyeniñ Mudafaa nazirligi Rusiye Federatsiyasınıñ 13 regionı ve işğal etilgen Qırım ve Azaq deñizi üzerinde 356 dron urıp tüşürilgeni aqqında haber etti.
Ukrayina askerleri bu ücümni şimdilik daa izaatlamadılar.
"Qırım.Aqiqat" cenk şaraitleri sebebinden bu malümatnı mustaqil sekilde tasdıqlap olamay.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.