Cemaat aşağan yerler, musafirhane ve şifahane-kurort saasınıñ müessiseleri Qırımda eñ az iyün ayına qadar qapalı qalacaq. Bu aqta regional Rospotrebnadzor idaresiniñ yolbaşçısı Natalya Penkovskaya Qırımdaki biznes işleriniñ şaraitlerini qolaylaştıruv tedbirlerini azırlav ve yerine ketirüv işçi gruppasınıñ toplaşuvı vaqtında bildirdi.
Bundan ğayrı, psiho-nevrologik internat ve saqatlığı olğan esli-başlı insanlar içün internat evleri 14 kün qapalı olacaq.
«Qapalı rejimde çalışqan müessiselerge çoqça diqqat ayırılmalı, şunıñ içün tünevin qapalı müessiselerde bulunğan hadimler ve şahıslarnıñ 14 künge tamamen qapatılmasını teklif ettim», – dep bildirdi Penkovskaya.
Qırımnıñ Rusiye baş nazir muavini Yelena Romanovskaya öksüz balalar içün evlerni de 14 künge qapatmağa teklif etti.
Rusiye kontrolindeki Qırım yolbaşçısı Sergey Aksenov karantin tedbirleri bitkenine qadar Qırımğa kelmemege rica etti. Moskva kontrolindeki Qırım kurort ve turizm naziri Vadim Volçenko Qırımğa iş sebebinden kelgenlerni yahşı etip teşkermege çağırdı.
Aprelniñ 24-nde saba Qırımda dört yañı koronavirus hastası qayd etildi. Al-azırda Qırımda 57 koronavirus hastası bar. Aqyarda 25 COVID-19 hastası qayd etildi.
