Qırımnıñ Rusiye ükümeti yolbaşçısı Sergey Aksenov bildirdi ki, yarımadadaki mektep ve bala bağçalarında silâlı qaravul olmasını talap etecek. Bunı Aksenov bazarertesi künü, oktâbrniñ 22-nde, haber etti.
Onıñ aytqanına köre, aftanıñ soñuna qadar Qırım ükümeti oquv yurtlarındaki telükesizlik tedbirleriniñ quvetleştirilmesinen bağlı teklifler azırlaycaq.
«Vaziyetke baqmadan, mektep ve bala bağçalarında daimiy sürette tasil alğan silâlı hadimler olmasını israr etecek. Bu meselenen bağlı qarar federal seviyede qabul etilgen soñ belli olacaq, o vaqıtqa qadar qırımlılarnıñ telükesizligini temin etmek içün bizler elimizden kelgenini yapamız», – dep yazdı Aksenov Facebookta.
Bazarertesi künü Sergey Aksenov oktâbrniñ 17-nde Keriç politehnik köllecinde olğan patlav ve atışuvdan soñ ilân etilgen fevqulâde vaziyet rejimini lâğu etti.
Patlav ve atışuv çarşenbe künü, oktâbrniñ 17-nde, Keriç politehnik köllecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Rusiye ve ilhaq etken Qırım hastahanelerinde Keriçteki ücümde yaralanğan 46 insan buluna, üçü ağır alda. Qırım hastahanelerinde Keriçte yaralanğan 14 genç ve 11 büyük qala. Olarnıñ alı orta ağır dep sayıla.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
