UNESCO komitetiniñ sessiyasında iyünniñ 30-nda Qırımdaki medeniy ve tarihiy miras yerleri vaziyetiniñ monitoring neticeleri taqdim etilecek.
Bu aqta mayısnıñ 29-nda Kyivdeki tögerek masada Ukraina Tış işler nazirliginiñ hususiy avaleler elçisi, Ukrainanıñ UNESCO eyyetiniñ yolbaşçı muavini Sergey Reva bildirdi, dep haber ete Qırım.Aqiqat mühbiri.
«Ukraina Tış işler nazirligi Qırımdaki medeniy ve tarihiy miras yerlerindeki vaziyet monitoringi boyunca malümatnıñ koordinatsiyası ve azırlanuvını kerçekleştire. Monitoring maruzası baqılacaq UNESCO komitetiniñ daa bir sessiyası iyünniñ 30-nda olacaq. Monitoring iştirakçileri, mesüliyetli teşkilât ve qurulışlarnı nazirlikke malümat bermege çağıramız. UNESCOnıñ ayrı diqqatını Bağçasaraydaki Han sarayına celp etmege planlaştıramız», – dep bildirdi Sergey Reva.
Ukraina medeniyet naziri Yevğen Nışçuk Ukraina Rusiye ilhaq etken Qırımda Han sarayınıñ vaziyetini teşkerecek monitoring missiyasını bekley, dep bildirgen edi.
Kyiv Rusiye akimiyeti Han sarayında keçirgen «restavratsiyanı» tenqit etmekte. Ukraina medeniyet nazirligi bu işler sebebinden Han sarayınıñ baş binasında yıqıluv telükesi bar, dep qayd ete.
Qırımtatar faali Edem Dudakov Bağçasaraydaki Han sarayınıñ «restavratsiya» neticesini «butaforiya» dep adlandırdı. Bu şekilde o, Büyük Han caminiñ «rekonstruktsiya» işleriniñ birinci basamağı yekünlengenine dair beyanatnı izaatlağan edi.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
