Rusiye nezaretinde olğan Qırımnıñ Yuqarı makemesi, evel «çaqmama» ile qabaatlanıp, para cezasına mahküm etilgen qırımtatar Enver Topçiniñ istinaf şikâyetini red etken.
Bunıñ aqqında advokat Emil Kurbedinov, «Qırım birdemligi» cemaat birleşmesine haber etti.
Kurbedinovnıñ sözlerine köre, cinayet davasındaki çoq sayılı bozuluvlarğa dair imaye tarafınıñ delilleri «makemeniñ» soñki qararına tesir etmegenler. Bozuluvlar arasında: tahqiqat safhasında işğal FSB, advokatlarnı Enver Topçige yibermeyip, protokollarnıñ imzalanuvına basqı astında irişe ediler.
Advokat, Enver Topçige dair ükümni «saltıq saçması» dep adlağan, çünki Topçi tarafından çaqılmağan Ümidcon Dadaconovnı qabaatlı dep tanıy. Amma Dadaconovğa dair cinayet dava daa süre ve makemeniñ qararına qadar suçsuz olıp qala.
İmaye tarafı ükümni temyiz makemesinde temyiz etecek ola, soñra ise uyğun cevapnı almaq içün cinayet davasını halqara makemelerige yollamağa planlaştıra.
Rusiye nezaretinde olğan Qırımnıñ İçki rayon mahkemesi Rusiye Ceza qanunnamesiniñ 205.6 maddesine binaen (cinayet aqqında haber etmeme) qabaatlanğan qırımlı Enver Topçige üküm çıqardı. Mahkemeci Topçini 40 biñ ruble para cezası berilmesine mahküm etti.
Mudafaa tarafı Rusiye qırımlı Enver Topçige çıqarılğan ükümni temyiz etecek ola.
Martnıñ başında olğan mahkemede dinşınas, bundan evel ise FSB şaatları ve gizli şaat sorğuğa çekildi.
Avgustnıñ 31-nde Rusiye quvetçileri Sudaq, İçki ve Seyitler rayonlarında Enver Topçi, Ayder Ablâkimov, Ridvan Umerov ve Ayder Kadırovnıñ evinde tintüv keçirdi.
Dört qırımlığa qarşı Rusiye Ceza kodeksiniñ 205.6 maddesine istinaden (cinayet aqqında haber etmeme) dava açıldı. Oña köre 100 biñ rublege qadar para cezası, 1 yılğa qadar mecburiy işler ya da aynı müddetke apis cezası berile bile.
Mabüsler uquq qoruyıcı organlarına Umicon Dadajonov ile içtimaiy ağlarda yazışqanını bildirmegeninde qabaatlana. O, FSB bildirgenine köre, «Rusiyede terror teşkilâtı tanılğan «IŞİD» teşkilâtınıñ faaliyetinde iştirak etken edi».
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
