Rusiyeniñ nezaretinde olğan Qırımnıñ Yuqarı mahkemesinde «devlet hainliginen» qabaatlanğan Qırım sakini İvan Yatskinniñ davası boyunca nevbetteki oturış olıp keçti. Mahkeme oturışı vaqtında advokat Nikolay Polozov Yatskinniñ apayı ve balaları ile korüşip olması içün tekrar muracaat etti, amma mahkeme red etti. Bunı advokat Qırım.Aqiqatqa aytıp berdi.
Polozovnıñ sözlerine köre, mahkeme red etip, tek mahküm etilgenlerniñ körüşme aqqı bar dep, aytqan.
«Apis şaratine kelgende, İvan Grigoriyeviç keçken sefer mahkemede olğanda, Aqmescit SİZO-sında onıñ kamerasında tintüv olıp keçken ve Yatskiniñ çantası tübünde bir yıp tapılğan. Onı sorğuğa çekkenlerde, yipniñ olmağanını ve kimniñ olğanını bilmegenini ayttı. Bu FSİN operativcileri tarafından bir provokatsiya olğanını tüşünem. Onı qaçmağa azır olğanını tasdıqlamaq içün yapa bileler. Neticede, bunıñ sayesinde daa ciddiy nezaret içün esaslar olacaq», – dep tefsir etti Polozov.
Nevbetteki mahkeme oturışı aprelniñ 27-nde olacaq.
Жизнь семьи крымчанина Ивана Яцкина после его ареста (фотогалерея)
Hatırlatamız, evel mahkeme qırımlı İvan Yatskinni – 2021 senesi iyülniñ 1-ne qadar SİZOda qaldırdı.
Yanvarniñ 28-nde Qırımnıñ Curçı rayonındaki Toğaylı (Kormovoye) köyünde Yatskinniñ ömür arqadaşı Gülnara Kadırovanıñ evinde Rusiye quvetçileri tintüv keçirdi.
Qırımnıñ Curçı rayonınıñ Aybar (Voykovo) köyüniñ sakini İvan Yatskin 2019 yılda oktâbr 16-sında tutuldı. Bu dekabr ayında belli oldı.
Polozov, Yatskin apiske alınğan soñ Qırımdan Moskvağa çıqarıldı, dep bildirgen edi. Onıñ aytqanına köre, Rusiye quvetçileri qırımlığa «büyük maneviy basqı» yaptı.
Qırım.Aqiqatnıñ Ukraina telükesizlik hızmetine yollağan muracaat cevabında İvan Yatskin UTH ile işbirligi yapmadı, dep aytıla.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.
