Mahkemeler, Qırımdaki terroristik ve ekstremistik maddeler boyunca açılğan cinaiy işlerni prokuraturağa taqiqatqa tekrar-tekrar yollay, çünki «qanun bozuvları» qayd etile.
Böyle bir fikirni advokat Ayder Azamatov sentâbrniñ 29-nda «Qırım birdemliginiñ» toplaşuvında seslendirdi.
«Keçken afta «tabliglerniñ işi» boyunca ilk mahkeme oturışuvı keçirildi, mahkeme, «qanun bozuvlarını» qayd etip, davanı prokurorğa qaytarmağa qarar aldı. Mahkemeler tarafından bir tendetsiya olğanını körem. Mahkemeler er aynı hatalarnı körip, olarğa köz yummaqtan bezdi», – dedi Azamatov.
O, Yaltadaki ve Aqmescitteki «Hizb ut-Tahrir davalarını» örnek olaraq ketirdi. Rostov-na-Donu şeerindeki Şimaliy-Kavkaz okrugınıñ arbiy mahkemesi olarnı da prokuraturağa taqiqat tekrar keçirilsin dep yolladı.
«Mahkemeler, taqiqat aynı cinaiy işlerni uydurğanını körip, olarnı baqmaqtan vazgeçmege başladı. Ümüt etem ki, bunıñ sayesinde bir sıra dava dağılır ve bir daa mahkemege qaytmaz», – dep qoştı advokat.
Avgustnıñ 10-nda Rusiye nezaretindeki Aqmescitniñ Kiyev rayon mahkemesi Bağçasaraydaki «Hizb ut-Tahrir işi» iştirakçileriniñ apis muddetini uzattı. Server Zekiryayev, Marlen Asanov, Ernes Ametov ve Memet Bilâlov oktâbrniñ 9-na qadar SİZOda qalacaqlar.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta. Amma bu maqsatqa irişmek içün terroristik usullar qullanğanını inkâr ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etken edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
