Rusiyeniñ nezaretinde olğan Qırımnıñ Yuqarı mahkemesi mayısnıñ 26-nda Azatlıq Radiosınıñ frilanserı (Qırım.Aqiqat leyhası) Vladislav Yesipenkonıñ tevqif müddetiniñ uzatılmasına qarşı berilgen istinafnı red etti, dep haber etti ömür arqadaşı Yekaterina Yesipenko.
Böylece, Vladislav Yesipenko SİZO-da 2021 senesi iyülniñ 11-nece tutulacaq.
Apayı Yekaterina Yesipenkonıñ bildirgenine köre, aqayını mahkeme oturışına ketirmegenler, o video bağ vastasınen iştirak etken.
Vladislav Yesipenko kendini yahşı duya, SİZO-da sportnen oğraşa ve yaqınlarından yollanmalar ala.
Aprelniñ 30-nda, Rusiye nezaretinde olğan Aqmescitniñ Kyiv ayon mahkemesi Yesipenkonıñ tevqif müddetini eki ayğa uzattı.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi.
FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken. Kreml kontrolindeki mahkeme Yesipenkonı mayısnıñ 11-ne qadar apiste qaldırdı.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Vladislav Yesipenkonıñ tutuluvı ve apiske alınması sebebinden cinaiy tahqiqat başlattı, dep bildirdi.
Ukraina Tış işler nazirligi Qırımda tutulğan Vladislav Yesipenkonen mustaqil advokatnı körüştirmege talap ete.
