Kreml kontrolindeki Qırım Yuqarı mahkemesi noyabrniñ 22-nde «Veciye Kaşka davasınıñ» malümatlarını ögrenmek içün bu davanıñ mabüsleri Bekir Degermenci, Ruslan Trubaç ve Kazim Ametovğa belgilengen müddet sıñırlarını qanunğa uyğun olaraq tanıdı. Bunı Qırım.Aqiqat mühbiri haber ete.
Ametovnıñ advokatı Emil Kürbedinov qayd etkenine köre, mahkeme imayeniñ aytqanlarına emiyet bermeyip, qararnı sebepsiz qabul etti.
Haber etile ki, advokat Edem Semedlâyev sağlığı fenalaşqan Bekir Degermencini ev apsine almağa rica etti, amma mahkeme red etti.
Mabüsler oturışuvda video bağı vastasınen iştirak etti.
«Veciye Kaşka davasınıñ» mabüsleri Bekir Degermenci, Ruslan Trubaç, Kazim Ametov dekabrniñ 7-ne qadar nezaret altında qaldırıldı. Asan Çapuh ev apsinde qala.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşından para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
