Rusiye kontrolindeki İslâm Terek rayon mahkemesinde oktâbrniñ 27-nde «ukrain milliy batalyonında» iştirak etkeninde qabaatlanğan Mecit Ablâmitovnıñ davası temelden baquv oturışuvı keçirildi, dep bildire Qırım.Aqiqat mühbiri.
«Oturışuv diñleyicisiz keçti, mahkeme salonında tek esnas iştirakçileri bar edi. Mahkeme bu qararını Qırımda kirsetilgen karantin tedbirlerinen añlattı. Bugün ilk temel oturışuvında qabaatlav tarafı davanıñ qabaatlav qararını oqudı. Mecit Ablâmitov qabaatlayıcı qararğa olğan munasebetini bildirdi. Mecit oturışuv vaqtında Ukraina vatandaşı olğanını ve özüni qabaatsız dep sayğanını ayttı», – dep tarif etti advokat Ayder Azamatov.
Bundan ğayrı, qabaatlav mahkeme esnasını qapatmağa rica etti.
«Qabaatlav tarafı esnas iştirakçileri içün telükesizlik bar der, mahkeme esnasını qapatmağa rica etti. Qabaatlavnıñ Mecitniñ davası boyunca celp etken şaatları tahqiqat tedbirlerinde iştirak etse de, Mecit Ablâmitovnen yüzleştirüv ve tanuv olmadı. Mesleat odasına ketken qadı esnasnı qapatmağa qarar berdi», – dep qoştı advokat.
Avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.
Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
