Rusiye kontrolindeki Qırımnıñ Yedi Quyu rayon mahkemesi 24 yaşında Qırım sakini Fevzi Sagancini «Ukrainada qanunsız silâlı birleşmede iştirak etkeninde» qabaatlap üküm çıqardı.
Bu aqta «Krıminform» Qırım ve Aqyardaki Rusiye FSB idaresiniñ malümatına esaslanıp bildire.
Üküm 2019 senesi yanvarniñ 23-nde çıqarıldı.
«Yedi Quyu rayon mahkemesi Fevzi Sagancini cinayet işlegeninde qabaatlı tanıp, 10 yıl 6 ayğa azatlıqtan marum etti», – dep aytıla haberde.
Tahqiqat malümatına köre, Qırım sakini 2016 senesi yanvar ayında «N. Çelebicihan qırımtatar göñülli batalyonı» saflarına qoşulğan edi.
«2016 senesi yanvar ayından başlap 2017 senesi sentâbr ayına qadar Fevzi Saganci işbu qanunsız silâlı birleşmeniñ azası olıp, onıñ qurulış maqsadlarına qoltutıp, (Ukraina sıñırı tarafından Qırım qamaçavı, Qırım yarımadasınıñ Ukraina terkibine qaytması içün küreş, şu cümleden silâlı küreş) batalyon faaliyetinde faal iştirak etti, atıcılıq-ateş, el ve mayın-patlayıcı azırlıq kördi», – dep bildire Qırımdaki FSB idaresi.
Haber etile ki, Saganci 2017 senesi sentâbr ayında Qırımğa qaytıp keldi. 2018 senesi aprel ayında onı Qırım ve Aqyardaki Rusiye FSB idaresiniñ hadimleri tutıp aldı. İdareniñ tahqiqat bölügi oña qarşı Rusiye Ceza kodeksiniñ 208-inci maddesiniñ 2-nci qısmına istinaden cinaiy iş açtı.
Saganciniñ üküm ile bağlı açıq izaatları yoq.
2018 senesi martnıñ 20-nde Rusiye kütleviy haber vastaları «qırımtatar göñülli batalyonında» iştirak etkeninde qabaatlanğan 24 yaşında erkek tutulğanını bildirgen edi.
Rusiye FSBsi tutulğan kişiniñ adını aydınlatmağan edi.
O vaqıt «Asker» cemaat birleşmesiniñ reberi Lenur İslâmov işğal etilgen Qırımda Rusiye uquq qoruyıcıları tarafından «qırımtatar göñülli batalyonında» iştirak etkeninde qabaatlanıp tutulğan 24 yaşında erkek aqqında haberi olmağanını aytqan edi.
2018 senesi noyabr ayında advokat İslâm Velilâyev bildirdi ki, Qırımda «qanunsız silâlı birleşmelerde» iştirak etüv içün cinaiy taqipler çoqlaşa bile.
2019 senesi yanvarniñ 23-nde belli oldı ki, Qırımda «Noman Çelebicihan ukrain batalyonınıñ azaları qayd olğan» adreslerde tintüvler olıp keçti. Daa soñra alınğan haberge köre, Qırımdaki Rusiye FSBsi «Asker» cemaat birleşmesiniñ vekili Evelina Arifovanıñ ana-babası oturğan evni ve qırımlı Bekir Abultarovnıñ evini tintti.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Qırımtatar Milliy Meclisi, bu meselenen bağlı bütün malümat Ukraina prezidenti Petro Poroşenko ve İç işler naziri Arsen Avakovğa berildi, dep qayd etken edi.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
