Rusiye kontrolindeki Aqmescitniñ Jeleznodorojnıy mahkemesi advokat Rifat Yahinniñ davasını qısmen qanaatlendirip, Rusiye Cezalarnı yerine ketirüv federal hızmetiniñ 91-inci tibbiy bölük yolbaşçısını Aqmescitteki ekinci «Hizb ut-Tahrir davasınıñ» mabüsi Cemil Gafarovğa kösterilgen tibbiy yardım aqqında malümat bermeknen vazifelendirdi. Bu aqta «Qırım birdemligi» cemaat birleşmesi haber ete.
Bundan evel tibbiy bölük yolbaşçısı malümat bermege razı olmay edi, şunıñ içün advokat davanı mahkemege yolladı. Aynı vaqıtta Jeleznodorojnıy rayon mahkemesi prokurornıñ areketsizligini qanunsız dep tanımağa razı olmadı.
Rifat Yahinniñ bildirgenine köre, dava printsipial şekilde berildi, çünki bundan evel Moskva Cezalarnı yerine ketirüv federal hızmeti bütün muracaatlarğa «er şey güzel ve Cemil Gafarovnıñ er şeyi bar», dep cevap bergen edi. Cevaplarda aytılğan bütün ilâclarnı Gafarovğa tuvğanları yollay edi. Bir qısmı oña öyle de berilmedi.
«Ne kösterecekler, pek meraqlı. Ne içün bilmeyip boş yerde çıqarğanlar, ultrases talili bile yapılmadı. İlâclar soy-soplarından kele edi. Yardım kösterilmey edi. Onı cevapta nasıl yazalar – belli degil. Doğrusını aytqanda, imayeni körmemezlikke urğanlarından bezdim, şunıñ içün dava bermege qarar aldım. Advokatnıñ soqaq adamı degil, advokat faaliyeti qanunı ile belgilengen statuslı şahıs olğanını añlamaq kerekler», – dedi Yahin.
Qırım ve Aqyardaki Rusiye Cezalarnı yerine ketirüv federal hızmetiniñ idaresi ekim Gafarovnıñ sağlıq vaziyetini taqip ete, dep bildirgen edi.
Daa evel Gafarovnıñ advokatı Rifat Yahin müvekkiliniñ alı kritik oldı, dep qayd etken edi. Cemil Gafarov üçünci derece saqatı, büyrekleri hasta ve yürek hastalıqları bar. Advokat Gafarovğa ilâc bermeyip, hastahanege avuştırmağa razı olmadılar, dep qoştı. Advokat, müvekkiliniñ tibbiy tedqiqlerine dair arizanı Aqmescit SİZOsınıñ memuriyetine berdi.
«Memorial» Rusiye aq qorçalayıcı merkezi Cemil Gafarovnı siyasiy mabüs dep tanıdı.
58 yaşında Cemil Gafarov 2019 senesi martnıñ 27-nden berli terrorizmden şübheli olğanı içün SİZOda tutula. Onı Rusiyede ve işğal etilgen Qırımda yasaqlanğan «Hizb ut-Tahrir» firqasında iştirak etkeninde qabaatlaylar. Gafarovnıñ ekinci derece saqatlığı bar.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
