Rusiye kontrolindeki Aqmescitniñ Kiyev rayon mahkemesi, tahqiqat versiyasına köre, Keriçte teraktlarnı azırlağan eki gençni eki ayğa apiske aldı. Bu aqta Qırım kütleviy haber vastaları bildire.
«Mahkeme, tahqiqatnıñ muracaatına baqıp, yaqalanğan gençlerni ilk tahqiqat müddetine eki ayğa apiske aldı – 2020 senesi aprelniñ 18-ne qadar», – dep bildire Rusiye Tahqiqat komiteti vekiliniñ aytqanlarını Qırım ükümetine yaqın «Krıminform» resursı.
Berilgen malümatqa köre, oturışuv qapalı oldı.
«RİA Novosti Krım» malümatına köre, gençlerden biriniñ yanında anası bar edi, ekincisiniñ yanında babası bar edi.
Gençlerniñ ana-babaları ya da olarnıñ advokatları mahkeme qararını şimdilik açıq izaatlamadılar.
Fevralniñ 18-nde Rusiye FSBsi Keriçniñ oquv yurtlarında terror ücümlerini azırlağanından şübheli sayılğan 2003 ve 2004 seneleri doğma eki gençni tuttı, dep bildirdi. Müessiseniñ bildirgenine köre, yaqalanğanlar «2018 senesi oktâbr ayında Keriç politehnik kollecinde 20 insannı öldürgen 18 yaşında Vâçeslav Roslâkovnıñizdeşleri, ekstremist mefküresiniñ tarafdarları» ola.
Rusiye Tahqiqat komitetiniñ yolbaşçısı bu dava tahqiqatını tezleştirmege emir etti.
Bundan soñ Qırım ve Aqyardaki Rusiye Tahqiqat komitetiniñ idaresi bu cinaiy davanı özü baqıp başladı.
Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovadan Rusiye FSBsi tutqan ve şeerniñ eki oquv yurtunda terror ücümlerini azırlağanından şübheli sayılğan çağına yetmegen eki Keriç sakini aqqında malümat bermesini talap etti.
