Rusiyeniñ nezaretinde olğan Qırımnıñ Yuqarı mahkemesi, evel «qanun talaplarını bozıp missionerlik faaliyeti ile» qabaatlanğan imam Ablâkim Galiyevniñ mudafaasınıñ red etilgen istinafını Sudaq rayon mahkemesinde yañıdan baqmağa qarar çıqardı. Bunı «Qırım birdemligine» advokat Rustem Kâmilev haber etti.
«İmam kene diniy faaliyetini yapıp olması içün aqlarını tiklemege tırışacaqmız», – dedi Kâmilev.
«Qırım birdemliginiñ» malümatına köre, evel mahkemeci Lüdmila Sologub imamnı 5000 ruble para cezasına mahküm etken edi. Mudafaa tarafı qarar qanunsız olğanı içün onı temyiz etti, amma mahkme istinafnı red etti.
Qırımda Rusiye tahqiqatçıları «qanun talaplarını bozıp, missionerlik faaliyetini kerçekleştirgeninde» qabaatlanğan imam Ablâkim Galiyevge qarşı memuriy dava açıldı.
Qırımda Rusiye nezaretinde olğan Qarasuvbazar mahkemesiniñ sulh mahkemecisi yerli caminiñ imamı Murtaza Ablâzovnı «Qırım Musulmanları diniy idaresiniñ şeaadetnamesi olmadan cuma namazını keçiregni içün» 15000 ruble para cezasına mahküm etti.
Martnıñ 2-nde Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi.
Avgustnıñ 14-nde Rusiye kontrolindeki Aluşta şeer mahkemesi advokatlar Rustem Kâmilev ve «qanunsız missionerlik faaliyetinde» qabaatlanğan imam Yusuf Aşirovnıñ istinaf şikâyetlerini baqmadı. Aşirovğa 5 biñ ruble para cezası berildi.
«Qırım aq qorçalayıcı gruppasınıñ» eksperti Aleksandr Sedovnıñ qayd etkenine köre, Rusiye işğal altındaki Qırım yarımadasında diniy teşkilâtlarnı taqip ve ayırım areketlerini toqtatmaq talabına qulaq asmay.
