Kreml kontrolindeki Sudaq şeer mahkemesi fevralniñ 15-nde «cinayet aqqında haber etmegeninde» qabaatlanğan (Rusiye Ceza kodeksiniñ 205.6 maddesi) qırımtatar faali ve din adamı Ridvan Umerovnıñ davasını temelden baqıp başladı, dep haber ete Qırım.Aqiqat mühbiri.
Oturışuv qapalı oldı, diñleyiciler mahkemege kirsetilmedi. Oturışuv vaqtında qabaatlav tarafı Ridvan Umerovnıñ davası boyunca qabaatlav qararını oqudı.
«Bugün prokuror müvekkilim Ridvan Umerovnıñ davası boyunca qabaatlav qararını oqudı. Bu qabaatlav qararından añlaşıla ki, onı FSB idaresiniñ hadimlerine oña farqlı saifelerden IŞİDde bulunğanını ve «kâfirlernen» küreşkenini yazğan Umicon Dadaconov ile tanış olğanını bildirmedi», – dep bildirdi Umerovnıñ advokatı Marlen Halikov Qırım.Aqiqatqa.
Hatırlatamız, fevralniñ başında Rusiye kontrolindeki Sudaq şeer mahkemesi Ridvan Umerovğa qarşı cinaiy davanı qapatmağa razı olmadı.
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
