Rusiye kontrolindeki Yalta şeer mahkemesi martnıñ 3-nde patlayıcı maddelerni qanunsız azırlağanında ve saqlağanında qabaatlanğan siyasiy mabüs Yunus Maşaripovnı diqqatlı közetüv olacaq psihiatrik hastahanesine yatqızmağa qarar aldı.
Bu aqta advokat Aleksey Ladin Qırım.Aqiqatqa bildirdi.
«Mahkeme qararında müvekkilime qarşı mecburiy tibbiy tedbirler aqqında aytıla. Mahkeme Yunus Maşaripovnı psihiatrik hastahanege ve intensiv közetüv altına yatqızmağa qarar aldı», – dep ayttı advokat.
Ladinniñ bildirgenine köre, imaye bu qararğa razı degil ve onı şikâyet etmege niyetlene.
«Şübhesiz şikâyet etecekmiz. İstinaf instantsiyası soñki qararnı çıqarğanına qadar Yunus Maşaripov SİZOda bulunacaq», – dep qoştı Ladin.
Hatırlatamız, yanvarniñ 16-nda Rusiye kontrolindeki Yalta şeer mahkemesiniñ oturışuvında Yunus Maşaripov işkencege oğratılğanını bildirdi.
Maşaripov 2017 senesi sentâbr ayında tutulıp apiske alındı. Aq qorçalayıcılarnıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
«Krım 24» akimiyetke qoltutqan Qırım telekanalı FSBniñ aq qorçalayıcını çekken sorğu videosını derc etti. Sorğu vaqtında Maşaripov, «Yaltada içtimaiy-siyasiy vaziyetke dair malümat toplağanını, turistik mevsimni bozmaq içün plâjlarda ine atqanını, ormannı ateşke bergenini ve Rusiyege qarşı risalelerni tarqatqanını» tarif etti. Videoda aytılğanı kibi, Maşaripov bunı «Qırımtatar Milliy Meclisiniñ teşebbüsinen yaptı, onı ise Ukraina telükesizlik hızmetiniñ hadimleri idare etti».
Meclis reisi Refat Çubarov Qırım.Aqiqatqa bu malümatnı red etti.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.
