Rusiyeniñ nezaretinde olğan Qırımnıñ Yuqarı mahkemesi Muvaqqat tutuv izolâtorından advokat Edem Semedlâyevniñ azatlıqqa çıqmasıın aydınlatqan "Grani.ru" internent neşriniñ mühbirleri Alim Suleymanov ve Enver Alimovnı, vatandaş jurnalisti Dlâver İbragimovnı tevqifli qaldırdı.
"Qırım birdemligi" cemaat birleşmesiniñ haber etkenine köre, istinaf şikâyetleriniñ baqılması qabaatlanğanlarnıñ iştirgi olmadan keçirilgen.
"Bütün bu davalar müvekkilerimizniñ qabaatsız olğnanını açıq ve aydın şekilde köstere. olarğa aqsızlıq ettiler. Pek çoq qanun bozuldı. Bunı böyle qaldırmaycaqmız, Avropa insan aqları mahkemesine şikâyetler azırlaycaqmız", - dedi cemaat imayecisi Sabri Talıpov.
Aqmescitte noyabrniñ 23-nde aqşam Rusiye quvetçileri azatlıqqa çıqqan Edem Semedlâyevni qarşılamaq içün vaqtınca tutuv izolâtorınıñ binasına kelgen faallerni tuttı. 31 insan tutuldı, aralarında 10 qadın, jurnalistler ve matbuat kartları olğan «Qırım birdemliginiñ» mühbirleri bar. Tutulğanlar üç polis bölügine alıp ketirildi.
Aqmescitniñ vaqtınca tutuv izolâtorınıñ binası ögünde tutulğan 15-ten çoq qırımtatar faali Rusiye kodeksiniñ memuriy maddesine istinaden apiske alındı.
Qırım Muhtar Cumhuriyeti ve Aqyar prokuraturası qırımtatar faalleriniñ tutuluvı sebebinden cinaiy tahqiqat başlattı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti böyle çağıruvlarnı körmemezlikke ura.
