Aqmescitte Muvaqqat tutuv izolâtorınıñ binası yanında yaqalanğan 15-ten ziyade qırımtatar faali tevqif etildi. Bunı Qırım.Aqiqatqa "Qırım birdemligi" cemaat birleşmesi haber etti.
Dlâver İbragimov, Ernest Seytosmanov, Smail Kurtbekov, Enver Alimov 13 künge tevqif etildi.
Ruslan Azizov, Smail Abdurmanov, Reşat Paralamov, Alim Aliyev, Murtaza Fahriyev, Alim Suleymanov, Selim Teyfukov, Zekirya Demerci, Settar Settarov, Kemal Abdurazakov 12 künge , Kemal Nemetullayev, Simar Ablâlimov, Remzi Nimetulayev, Lenur Appazov – 10 künge tevqif etildi.
Bundan ğayrı Elvina Azizovağa 15 biñ ruble, Elmaz Abdurahmanova, Reyhane Kulametova, Ayşe Arslanova, Safinaz Gazançiyange 11 biñer ruble, Nayle İbragimova ve Fatime Yanikovağa 10 biñer ruble para cezası berildi.
Evel haber etilgeni kibi, vatandaş jurnalisti Vilen Temeryanov 14 künge tevqif etildi.
Aqmescitte noyabrniñ 23-nde aqşam Rusiye quvetçileri advokat Edem Semedlâyevni qarşılamaq içün Muvaqqat tutuv izolâtorınıñ binasına kelgen faallerni yaqaladı. 31 kişi yaqalanda, olarnıñ arasında 10 qadın, jurnalistler ve "Qırım birdemligi"niñ mühbirleri. Yaqalanğanlarnı polis bölüklerine alıp kettiler.
