Kreml kontrolindeki Qırım Yuqarı mahkemesi evelki instantsiya mahkemesine qarşı temyiz arizasını red etip, Bağçasaraydaki «Hizb ut-Tahrir davası» mabüsiniñ apayı, «Qırım balalığı» teşebbüsiniñ koordinatorı Mümine Saliyevanıñ 1000 ruble para cezasını deñiştirmedi. Saliyeva 2013 senesi Facebookta paylaşqanları içün mahküm etildi. Bu aqta «Qırım birdemligi» cemaat birleşmesi haber ete.
Faallerniñ malümatına köre, mahkeme oturışuvı vaqtında imaye esnas, «E» Merkezi vekilleriniñ, prokurornıñ iştirakini videoğa çıqarmaq içün izin istedi. Bu muracaat qanaatlendirilmedi.
Advokatlar ketirilüv protokolı tutuluv protokolından evel tizilgenine mahkemeniñ diqqatını celp etecek oldı.
Aqmescitniñ Kiyev rayon mahkemesi mayısnıñ 31-nde qırımtatar qadın faali, Bağçasaraydaki ekinci «Hizb ut-Tahrir davası» mabüsiniñ ömür arqadaşı Mümine Saliyevanı Rusiye Memuriy cinayetler kodeksiniñ 20.3 maddesini (yasaqlanğan teşkilâtnıñ timsallerini numayış etüv) bozğanında qabaatlı tanıp, oña 1000 ruble para cezasını berdi.
Qırım Muhtar Cumhuriyeti ve Aqyardaki Milliy politsiyanıñ Baş idaresi yarımadada qırımtatar qadın faali Mümine Saliyevanıñ tutuluvından sebep cinaiy tahqiqat başlatqan edi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
