Rusiye kontrolindeki Aqmescitniñ Merkeziy rayon mahkemesi oktâbrniñ 7-nde Ukraina ve Rusiye arasında kerçekleştirilgen cenk esirleri ve mahkümlerini almaşuvdan soñ bir aydan berli Kyivde bulunğan qırımtatar faali Edem Bekirovnıñ dava tahqiqatını toqtattı. Bu aqta advokat Aleksey Ladin Qırım.Aqiqat mühbirine tarif etti.
Onıñ aytqanına köre, cinaiy davanı qapatmaq muracaatını prokuror berdi, çünki Bekirov hastalıqları ve tedaviylevi sebebinden mahkeme oturışuvlarında şimdilik iştirak etip olamay.
Qadı Sergey Demenov qabaatlav tarafınıñ muracaatına qoltuttı.
«Mahkeme, mahküm Bekirovnıñ mahkemede iştirak etmesine mania olğan ağır sağlıq vaziyeti sebebinden tahqiqatnı toqtatmaq kerek, dep saya», – dep aytıla mahkeme qararında.
Advokat Ladinniñ aytqanına köre, mahkeme qararına binaen, dava boyunca oturışuvlar Edem Bekirov sağlığını tüzetkenine qadar olmaycaq.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
