Kreml kontrolindeki Qırım Yuqarı mahkemesi dekabrniñ 26-nda qırımtatar faali Edem Bekirovnıñ apiske alınmasına qarşı berilgen itiraz arizasını baqmağa planlaştıra. Bu aqta advokat Aleksey Ladin dekabrniñ 21-nde Qırım.Aqiqatqa bildirdi.
«İmayeniñ itiraz arizası dekabrniñ 26-nda saat 10-nda Qırımnıñ Yuqarı mahkemesinde baqılacağını bugün bildim. Anda sıñırlav tedbiriniñ deñiştirilmesi meselesi köterilecek. Bizler ev apsi ya da pey, ya da çıqmamaq şartı aqqında rica etecekmiz. Sıñırlav tedbiri deñiştirilse, ev apsi olacaqtır», – dedi Ladin.
Advokatnıñ aytqanına köre, al-azırda imaye tarafı Bekirovnıñ SİZOda bulunması imkânsız olğanını isbatlaycaq tibbiy komissiyanı qurmağa rica ete.
Ukraina Yuqarı Radasınıñ insan aqları vekâletlisi Lüdmila Denisova, tutılğan qırımtatar faaline acele tibbiy yardım kösterilmesi içün muracaatta bulunğanını bildirgen edi.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
Herson vilâyetindeki Novoalekseyevka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutuldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
