ATR qırımtatar telekanalınıñ saibi Lenur İslâmovnıñ davası boyunca mahkeme tahqiqatı yekünlendi. Rusiye kontrolindeki Qırım Yuqarı mahkemesiniñ dekabrniñ 2-nde olıp keçken oturışuvında prokuror Roman Lobov İslâmovnıñ 19 yıl sert rejimli koloniyada qalmasını istedi.
Bu aqta advokat Nikolay Polozov Qırım.Aqiqatqa tarif etti.
«Prokuror diversiyalarda qabaatlav boyunca 15 yıl, batalyon qurğanında qabaatlav boyunca 12 yıl apiste qalmasını, bir yıl sıñırlav ve kütleviy çağıruvlar sebebinden bir yıl sert rejimli koloniyada qalmasını talap etti», – dedi advokat.
Onıñ aytqanına köre, dava malümatlarında tahminen on beş kişi bar, Lenur İslâmovğa qarşı qabaatlayıcı üküm çıqarılsa, olar da aynı maddege istinaden cinaiy mesüliyetke çekile bile.
«Qanunsız silâlı birleşme iştirakçilerine qarşı endi ükümler çıqarıldı, olar müvekkilimniñ dava malümatlarında qayd etildi. Şunıñ içün ükümden soñ qırımtatarlarğa qarşı cinaiy taqipler quvetleşecek, dep tüşünem», – dep qoştı Polozov.
İslâmovğa qarşı üküm Qırımda dekabrniñ 10-nda çıqarılacaq.
İslâmov bugünki mahkeme oturışuvını daa izaatlamadı.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
İslâmovnıñ Qırım.Aqiqatqa bildirgenine köre, onıñ Rusiye kontrolindeki Qırım Yuqarı mahkemesiniñ oturışuvlarında iştirak etmege niyeti yoq. O, Qırımda oña qarşı esnasnı «sahte mahkeme» dep adlandırdı.
