Rusiye kontrolindeki Aqmescitniñ Kiyev rayon mahkemesi, advokat Nikolay Polozovnıñ «Veciye Kaşka davasınıñ» «tahqiqatçısı Nadejda Balaşovanıñ qanunsız areketlerine» qarşı bergen şikâyet arizasını qanaatlendirmedi. Bunı Polozov mahkemeden soñ bildirdi.
Onıñ aytqanına köre, mahkeme qararı «qanunsız» ola.
«Bunı Qırım Yuqarı mahkemesinde şikâyet etmege imkânımız bar», – dedi Polozov Facebooktaki video muracaatında.
Onıñ aytqanına köre, o, «Veciye Kaşka davasınıñ» tahqiqattan evel teşkerüvniñ metin qısmını «tolusınen baqıp», eñ yaqın vaqıtta eki videonı baqmağa planlaştıra: qırımtatar faalleriniñ tutulması ve can bergen Veciye Kaşkanıñ yarıp baqılması aqqında laf kete.
Polozov, oña «Veciye Kaşka davasınıñ» FSB videosını köstermeyler, dep bildirgen edi.
2017 senesi noyabrniñ 23-nde Aqmescitte Rusiye telükesizlik hadimleri, Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşından para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
İşbu dava iştirakçileriniñ sağlıq problemleri bar. Degermenci – astma hastasıdır, Çapuh SİZOda mikroinsult keçirdi.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
