Kreml kontrolindeki Aqmescitniñ Merkeziy rayon mahkemesi «nezaketli insanlar» abidesine boya tökken Maksim Sokurenkonıñ apis müddetini uzattı. Bu aqta Qırım aq qorçalayıcı gruppası haber ete.
Aq qorçalayıcılarnıñ aytqanına köre, Sokurenko martnıñ 26-na qadar Aqmescit SİZOsında qalacaq.
İmaye, apiske alınğan kişi ya da tuvğanlarınıñ izaatları şimdilik yoq.
Adise yanvar ayınıñ soñunda oldı. Rusiye insan aqları vekâletlisi Tatyana Moskalkova tutulğan kişi Kyiv sakini ola, dep bildire. Onı vandallıqta (Rusiye Ceza kodeksiniñ 214-ünci maddesiniñ 2-nci qısmı) qabaatlaylar.
Aqmescitteki «nezaketli insanlar» abidesi 2016 senesi iyül ayında Qırımnıñ Rusiye yolbaşçısınıñ babası Valeriy Aksenovnıñ teşebbüsi ile tiklendi.
2014 senesi Qırımda dünyada tanılmağan «referendum» keçirilgende iç bir işareti olmağan insanlar peyda olğan edi. Olar Ukraina ordusınıñ areketlerini blok etken edi. Daa soñra Rusiye prezidenti Vladimir Putin «nezaketli insanlarnıñ» Rusiye Silâlı quvetleriniñ hadimleri olğanını tanıdı.
