Rusiye kontrolindeki Aqmescitniñ Kiyev rayon mahkemesi Bağçasaraydaki üçünci «Hizb ut-Tahrir davasınıñ» mabüsi, cemaat jurnalisti Amet Suleymanovnı noyabrniñ 9-na qadar ev apsinde qaldırdı. Bu aqta advokat Lilâ Gemeci «Qırım birdemligi» faallerine bildirdi.
«Qayd etmeli ki, Amet ev apsinde olıp, mahkeme belgilegen bir qaideni bozmadı», – dep tarif etti Lilâ Gemeci ve Suleymanovnıñ apis müddeti üçünci kere uzatıla, dep hatırlattı.
Advokatnıñ malümatına köre, müvekkiliniñ sağlıq vaziyeti pek fenalaşa, acele yürekten ameliyat olmalı. Onıñ bildirgenine köre, Amet Suleymanov ev apsinde olğan vaqıtta oña bir qaç kere acele tibbiy yardım çağırılğan edi. Bundan ğayrı, Gemeci mahkemede kardiolognıñ tibbiy hulâsasını kösterdi, anda ekim mahkemege Suleymanovnıñ alı bir qarar olğanından beter olğanını bildire.
Amet Suleymanov ev apsine alınğan edi. Advokat Lilâ Gemeci bunı Suleymanovnıñ «ciddiy hastalığınen» bağlay.
Qırımlı aq qorçalayıcı Lutfiye Zudiyevanıñ Qırım.Aqiqatqa bildirgenine köre, martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri başlatıldı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
