Rusiye kontrolindeki Aqmescit Kiyev rayon mahkemesiniñ qadısı Andrey Dolgopolov martnıñ 12-nde Qırımdaki Rusiye FSBsiniñ tahqiqatçısınıñ muracaatı esasında Bağçasaraydaki üçünci «Hizb ut-Tahrir davasınıñ» mabüsi Amet Suleymanovnı ev apsine yolladı.
Bu aqta advokat Lilâ Gemeci Qırım.Aqiqatqa bildirdi.
«Qırımdaki «Hizb ut-Tahrir davalarında» ilk ev apsi qararı oldı. Ne yazıq ki, bu advokatnıñ iş neticesi degil. Ametniñ ciddiy (yürek – QA) hastalığı bar. Mahkeme salonında endi yaramadı. SİZOda bulunsa, ayatı içün telükeli olur. Ametniñ hastalığı (Rusiye – QA) ükümetiniñ apiste tutuluvına mania olğan hastalıqlar sırasına kire. Tahqiqatçı qanunğa ve sağlam fikirge qarşı çıqmadı, özü ev apsi şeklinde bir sıñırlav tedbiri belgilenmesini istedi», – dep tarif etti advokat.
Gemeciniñ qayd etkenine köre, mahkeme qararınen bağlı «quvançqa baqmadan», imayeniñ fikri deñişmey.
«İç bir tedbirge ve müvekkillerimiz qabaatsız olğanı içün olarğa qarşı seslendirilgen qabaatlaplarğa razı degilmiz», – dedi advokat.
Qırımlı aq qorçalayıcı Lutfiye Zudiyevanıñ Qırım.Aqiqatqa bildirgenine köre, martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri başlatıldı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
Onıñ malümatına köre, tutulğanlar Rusiye Ceza kodeksirniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
