Kreml kontrolindeki Qırım Yuqarı mahkemesi aprelniñ 2-nde rayon mahkemesiniñ fevral ayında Qurmandaki «Hizb ut-Tahrir davasınıñ» mabüsi Rustem Emirüseinovnıñ evinde tintüv keçirmek qararına qarşı imayesi bergen şikâyetni red etti. Bu aqta oturışuvdan soñ Emirüseinovnıñ advokatı Mammet Mambetov bildirdi, dep haber ete «Qırım birdemligi» cemaat birleşmesi Facebookta.
«Bugün Qırımnıñ Yuqarı mahkemesinde 2019 senesi fevralniñ 13-nde Kiyev rayon mahkemesi çıqarğan qararğa qarşı itiraz arizam baqıldı, bu qarar esasında müvekkilim Rustem Emirüseinovnıñ evinde tintüv keçirilgen edi. İmaye işbu qarar milliy ve halqara uquqqa zıt bir şekilde çıqarıldı, dep tüşüne… Şikâyetim qısmen qanaatlendirildi. Kiyev rayon mahkemesiniñ qararına bazı tüzetüvler kirsetildi, 5-6 söz alıp taşlandı. Umumen ise bu qarar pek deñişmedi. Demek ki, şikâyetim red etildi», – dedi advokat.
Oturışuv açıq oldı, Rustem Emirüseinovnı tuvğanları körip oldı.
Fevralniñ 14-nde Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
