Kreml kontrolindeki Aqyarnıñ Lenin rayon mahkemesi aprelniñ 12-nde «Hizb ut-Tahrir teşkilâtında iştirak etkeninde» qabaatlanğan Yaşar Şihametovnıñ apis cezasını daa 3 ayğa ve 29 künge uzattı. Bu aqta «Qırım birdemligi» advokat Aleksey Ladinniñ malümatına esaslanıp haber ete.
Böylece, Şihametov iyünniñ 14-ne qadar apiste qalacaq.
Cemaatçılarnıñ malümatına köre, mahkeme FSB üyken tahqiqatçısı Andreyev, Şihametovnıñ apiste qaluv müddetini uzatılmalı, çünki mabüs ilk tahqiqat organlarından saqlana ya da gizli şaatlarğa basqı yapa bile, dep ayttı.
«Tahqiqatçı Ceza-protsessual kodeksiniñ madde mevzusından bütün sebeplerni, hususan «ilk tahqiqat ve mahkeme organlarına başqa şekilde keder etmek» ibaresini de yazıp aldı», – dep izaatladı mahkeme qararını Aleksey Ladin.
İmayeniñ Şihametov Biy Boluş (Orlovskoye) köyünde yaşay, eki çağına yetmegen balanıñ babası ola, iş adamı olaraq qayd etildi ve «içtimaiy olaraq alışqan insan», bergi töley kibi delilleri körmemezlikke uruldı, dep qoştı advokat.
Yaşar Şihametov cinayetçi o degil, tintüv vaqtında oña yasaqlanğan edebiyatnı gizliden qoyğanlar ola dep aytqan soñ onı mahkemeden çıqarğanlar, dep qayd ete aq qorçalayıcılar.
«FSB idaresiniñ tahqiqatçısı Andreyev apiste tutuv müddetini uzatuv muracaatını soñunace oquğan soñ, mabüs oturışuv salonına qaytarıldı ve qabaatı olmağanını aytmağa devam etti», – dep bildirdi «Qırım birdemligi».
Hatırlatamız, martnıñ 17-nde Kreml kontrolindeki Aqyar şeer mahkemesi Yaşar Şihametovnı aprelniñ soñuna qadar apiste qaldırdı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemliginiñ» faali Lutfiye Zudiyevanıñ aytqanına köre, tutulğanlar «Hizb ut-Tahrir» teşkilâtı ile alâqaları olğanından şübhelene ve Rusiye Ceza kodeksiniñ 205.5 maddesine istinaden qabaatlana.
Qırım Muhtar Cumhuriyeti ve Aqyar prokuraturası Qırımda keçirilgen kütleviy tintüvler sebebinden cinaiy tahqiqat başlatıldı, dep bildirdi.
Ukraina prezidentiniñ Qırım Muhtar Cumhuriyetindeki daimiy temsilciligi Rusiye quvetçileriniñ Qırımda musulmanlarnıñ (ekseriyeti qırımtatarı ola) evlerinde keçirgen tintüvleri aqqında malümat Ukraina uquq qoruyıcılarına berile ve «milliy ve halqara seviyedeki işte» qullanılacaq, dep bildire.
Ukraina Tış işler nazirligi Rusiye quvetçileriniñ fevralniñ 17-nde işğal etilgen Qırımda keçirgen tintüv ve tutuvlarğa qarşı narazılıq bildirdi. Müessise, halqara institutlarnı bu areketlerge qıymet kesmege çağırıp, soñki tutuv ve tintüvler aqqında malümatnı BM Baş Assambleyasınıñ sessiya baqıluvına çıqarmağa planlaştıra.
Ukraina Reintegratsiya nazirligi halqara toplulıqnı Qırımdaki tutuvlarğa cevap bermesine çağırdı.
«Hizb ut-Tahrir davası»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
