Rusiye kontrolindeki Qırım Yuqarı mahkemesi imayeniñ istinaf şikâyetlerini red etip, «Hizb ut-Tahrir davasınıñ» altı mabüsi Ayder Cepparov, Riza Ömerov, Enver Ömerov, Ruslan Nagayev, Lenur Halilov ve Eskender Suleymanovnı apiste qaldırdı. Böylece, olar 2020 senesi fevralniñ 5-ne qadar SİZOda qalacaqlar.
Bu aqta «Qırım birdemligi» birleşmesi haber ete.
«Mahkeme bütün şikâyetlerni red etti. Bir çoq kere ketirgen esas delillerimizge emiyet berilmedi», – dedi advokat Konstantin Rustemov.
Diger advokat Rustem Kâmilev müvekkili Eskender Suleymanov oturışuv vaqtında mahkeme bütün delillerge emiyet berip, qabaatlav tarafını tutmamalı dep aytqanını tarif etti. Faqat mahkeme buña qulaq asmadı.
«Tahqiqat, Eskender saqlana, bir de bir delillerni boza, şaatlarğa tesir ete bile, dep bildire. Tahqiqat er şey mümkün olğanını tüşüne», – dedi Kâmilev.
Advokatnıñ aytqanına köre, Suleymanov, oña nisbeten 1949 senesiniñ Jeneva şartnamesiniñ (cenk vaqtında vatandaş ealisini qoruv) normaları qullanılsın dep talap etti.
İyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) aıçlğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy dava açtı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
