Rusiye kontrolindeki Aqmescitniñ Kiyev rayon mahkemesiniñ qadısı Denis Didenko iyülniñ 9-nda «Hizb ut-Tahrir davasınıñ» (Qurman gruppası) mabüsi Rustem Emirüseinovnıñ apis müddetini 2019 senesi sentâbrniñ 13-ne qadar uzattı, dep haber ete Qırım.Aqiqat mühbiri.
Apiske alınğannıñ advokatı Emil Kurbedinov oturışuvda sıñırlav tedbirini ev apsine deñiştirmege rica etti.
«O, ağır cinayette qabaatlana, amma al-azırda bu insan em cemiyet, em cemaat ögünde temizdir. Tahqiqat kete, çalışsın, onı apiste tutmaq içün sebep degil. Başından berli müvekkilim saqalana, şaatlarğa tesir ete bile ya da birisini qorquza bilecegini isbatlaycaq bir delil kösterilmedi», – dep qayd etti Emil Kurbedinov,
Mahkeme imaye tarafınıñ muracaatına qoltutmadı. Qayd etilgeni kibi, Aqmescitteki SİZOda ilân etilgen karantin sebebinden Emirüseinov mahkemege ketirilmedi. Apis müddeti Rustem Emirüseinov iştirak etmegen oturışuvda uzatıldı.
«Kamerasında qızamıq qırğınlığı bar, ve mahkeme oturışuvınıñ iştirakçileri hastalıqqa oğramasın dep, onı ketirmediler. Amma onı video bağı vastasınen bağlamaları mümkün edi. Video bağınıñ sağlığımız içün telükesi yoq», – dep ayttı Rustemniñ ömür arqadaşı Aliye Emirüseinova.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
