Fevralnıñ 24-nde Kreml nezaretinde olğan Qırımnıñ Yuqarı mahkeme “Hizb ut-Tahrir davası”nıñ mabüsi Riza Ömerovnıñ apayı Sevilâ Ömerovağa qarşı açılğan davanı kene baqıp çıqmağa qarar çıqardı.
Bunı Qırım.Aqiqatqa “Qırım birdemligi” cemaat birleşmesiniñ faalleri advokat Ayder Suleymanovğa atfı etip bildirdi.
"Polis hadimleri ve mayor Litvinov Canköy mahkemesiniñ qararından memnün olmadı ve Qırımnıñ Yuqarı mahkemesine şikâyet berdi. Mudafaa tarafından başlanğıç mahkemeniñ qararı ile olar razı olğanlarını ögrendi, amma epsi bir davanı Canköy mahkemesine tekrar baqıluvğa yolladı. Öz qararını, Sevilâ Ömerova kerekli kibi haberdar etilmegeni ile añlattı. Bunen mahkeme oturışı bitti. Nevbetteki Canköy mahkemesiniñ zalında keçirilecek", – dep yazıla “Qırım birdemligi”niñ malümatında.
Faallerniñ malümatına köre, Sevilâ Ömerovağa Canköy rayonınıñ Qalay (Azovskoye) qasabasında bir kişilik narazılıq aktsiyasını keçirgeni içün memuriy dava açılğan edi. Canköy mahkemesi cinayet faaliyeti olmağanı içün davanı qapatqan edi.
2020 senesi dekabrniñ 27-nde Sevilâ Ömerova Canköy rayonınıñ Qalay (Azovskoye) qasabasında bir kişilik narazılıq aktsiyasını ötkerdi. Qadınnıñ yazuvlı şiarında «Qırımtatarlar terrorist degil! Repressiyalarnı toqtatıñız! Aqayımnı azat etiñiz».
Yanvarnıñ 12-nde, salı künü, Rostov-na-Donudaki Cenübiy bölgeniñ arbiy mahkemesi Qarasuvbazar “Hizb ut-Tahrir davası”nıñ mabüslerine üküm çıqardı: Enver Ömerovğa 18 yıl Ayder Cepparovğa 17 yıl, Riza Ömerovğa 13 yıl.
Ukraina Yuqarı Radasınıñ insan aqları vekâletlisi Lüdmila Denisova, yanvarnıñ 12-nde Cenübiy bölgeniñ arbiy mahkemesi Qarasuvbazar “Hizb ut-Tahrir davası”nıñ mabüslerine çıqarğan ükümni takbih etti ve halqara toplulıqnı küç-quvetini birleştirmege davet etti.
Ukraina TİN Rusiyeden Cenübiy bölgeniñ arbiy mahkemesiniñ Qarasuvbazar “Hizb ut-Tahrir davası” boyunca qararınıñ lâğu etilmesini ve “mahküm etilgen Enver ve Riza Ömerovlar ve Ayder Cepparovnıñ ve diger ukrain siyasiy mabüsleriniñ deral azat etilmesini” talap ete.
Avropa elçileri Rusiyeniñ Rostov-na-Donu mahkemesiniñ Qarasuvbazardaki «Hizb ut-Tahrir davasınıñ» mabüsleri, qırımtatar musulmanları Enver Ömerov, Riza Ömerov ve Ayder Cepparovğa çıqarğan ükümini takbih etti. Olar qırımlılarnı azat etmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
